ہسی، ہاؤرٹز کرکٹ ورلڈ کپ سے باہر

بی بی سی اردو - آسٹریلیا کے سٹار بیٹسمین مائیک ہسی اور سپنر نیتھن ہاؤٹزر زخمی ہونے کے باعث آسٹریلیا کے ورلڈ کپ سکواڈ سے باہر ہو گئے ہیں۔

مائیک ہسی کو ہیمسٹرنگ کا مسئلہ ہے جبکہ ہاؤٹزر کا کندھا 21 جنوری کو انگلینڈ کے خلاف ایک روزہ میچ کھیلتے ہوئے اتر گیا تھا۔

ان کی جگہ کیلم فرگوسن اور جیسن کریجا کھیلیں گے۔

کپتان رکی پونٹنگ بھی، جن کی انگلی ٹوٹ گئی تھی، اب بہتر ہو رہے ہیں اور خیال ہے کہ ورلڈ کپ تک وہ بالکل تندرست ہو جائیں گے۔

کرکٹ ورلڈ کپ اس ماہ سے بنگلہ دیش، انڈیا اور سری لنکا میں شروع ہو رہا ہے۔

چھتیس سالہ پونٹنگ آخری ایشز ٹیسٹ اور انگلینڈ کے خلاف پوری ایک روزہ میچوں کی سیریز نہیں کھیلے تھے۔ لیکن انہیں امید ہے کہ وہ اپنا پانچواں ورلڈ کپ کھیل سکیں گے۔

پونٹنگ نے کہا کہ ’یہ گزشتہ ہفتے کی نسبت اب بہت بہتر ہے۔ میں اس ہفتے نیٹس پر واپس گیا ہیں۔‘

آسٹریلیا کے کرکٹ بورڈ نے انٹرنیشنل کرکٹ کونسل کی ٹیکنیکل کمیٹی سے باقاعدہ طور کہا ہے کہ ہسی اور ہاؤٹزر کی جگہ فرگوسن اور کریجا کے نام پندرہ رکنی ٹیم میں شامل کر لیے جائیں۔

اکیس فروری کو آسٹریلیا زمبابوے کے خلاف میچ کھیل کر اپنے ورلڈ کپ ٹائٹل کے دفاع کا آغاز کرے گا۔