سلمان بٹ اورمحمد آصف پر تاحیات پابندی کا امکان

اردو ٹائمز - پاکستان کرکٹ ٹیم کے تین کرکٹرز سلمان بٹ ، محمد عامر اور محمد آصف کیخلاف اسپاٹ فکسنگ کیس میں آئی سی سی کے اینٹی کرپشن ٹریبونل نے فیصلہ پانچ فروری کو دینا ہے ،تاہم برطانوی میڈیا کا دعوی ہے کہ سلمان بٹ اور محمد آصف پر تاحیات پابندی لگادی جائے گی۔ معطل کر کٹرز محمد آصف ، محمد عامر اور سلمان بٹ پر لندن میں اسپاٹ فکسنگ کا الزام لگا تھا ، جس کے بعد آئی سی سی نے تینوں کر کٹرز کو معطل کردیا تھا ، اس کیس پر انٹرنیشنل کرکٹ کونسل کا اینٹی کرپشن ٹریبونل اپنی سماعت مکمل کرچکا ہے اور پانچ فروری کو اس کا فیصلہ دوحہ میں سنایا جائے گا ۔ برطانوی اخبار دی سن کادعوی ہے کہ آئی سی سی اینٹی کرپشن یونٹ نے تینوں کرکٹرز کیخلاف سخت ترین اور اینٹی کرپشن کوڈ میں وضع کردہ سب سے بڑی سزا دینے کا فیصلہ کیا ہے جس کے تحت سلمان بٹ اور محمد آصف پر تاحیات پابندی لگادی جائے گی جبکہ محمد عامر پر پانچ سال کی پابندی عائد کی جائے گی ۔