سہیل تنویر ورلڈ کپ سے باہر

بی بی سی اردو - لیفٹ آرم میڈیم فاسٹ بولر سہیل تنویر گھٹنے کی تکلیف کے سبب ورلڈ کپ سکواڈ سے باہر ہوگئے ہیں اور ان کی جگہ ایبٹ آباد سے تعلق رکھنے والے لیفٹ آرم فاسٹ بولر جنید خان کو ٹیم میں شامل کرلیا گیا ہے۔

پاکستان کرکٹ بورڈ کے مطابق ٹیم منیجمنٹ نے میڈیکل پینل کو جو رپورٹ دی ہے اس کے مطابق گھٹنے کے آپریشن کے بعد سہیل تنویر کو اب بھی مکمل طور پر فٹ ہونے میں وقت درکار ہے لہذا انہیں ورلڈ کپ سکواڈ میں برقرار نہ رکھنے کا فیصلہ کیا گیا ہے۔

سہیل تنویر نیوزی لینڈ کے دورے سے قبل بھی فٹنس کے حوالے سے شہ سرخیوں میں رہے تھے کیونکہ ٹیسٹ ٹیم میں ان کی شمولیت فٹنس سے مشروط تھی اور وہ ٹیسٹ سیریز شروع ہونے سے قبل ہی ان فٹ قرار دیئے گئے تھے تاہم بعد میں انہیں ون ڈے ٹیم میں شامل کیا گیا تھا۔

تین ون ڈے میچوں میں وہ صرف دو وکٹیں حاصل کرسکے۔

سہیل تنویر کی جگہ ٹیم میں شامل کئے جانے والے اکیس سالہ لیفٹ آرم فاسٹ بولر جنید خان ایبٹ آباد سے تعلق رکھتے ہیں اور پنتیس فرسٹ کلاس میچز کھیل چکے ہیں۔