ورلڈ کپ کے کپتان شاہد آفریدی

بی بی سی اردو - شاہد آفریدی کو ورلڈ کپ کے لئے پاکستانی کرکٹ ٹیم کا کپتان مقرر کردیاگیا ہے۔

اس طرح کئ ہفتے سے جاری وہ قیاس آرائیاں بالآخر ختم ہوگئی ہیں جو شاہد آفریدی کی جگہ مصباح الحق کو کپتانی دیئےجانے سے متعلق تھیں۔

پاکستان کرکٹ بورڈ کا بغیر کپتان ٹیم کا اعلان کرنا سب کے لئے حیرانی کا سبب بنا تھا اور یہ اس بات کا اشارہ تھا کہ شاہد آفریدی سے پاکستان کرکٹ بورڈ خوش نہیں اور وہ انہیں ورلڈ کپ کی کپتانی دینے کے لئے تیار نہیں حالانکہ وہ گزشتہ سال ون ڈے انٹرنیشنل میں پاکستان کے سب سے کامیاب کرکٹرثابت ہوئے تھے اور ان کی قیادت میں ٹیم نے جنوبی افریقہ اور انگلینڈ کے خلاف سیریز ہارنے کے باوجود اچھی کارکردگی کا مظاہرہ کیا تھا۔

شاہد آفریدی سے پاکستان کرکٹ بورڈ کی ناراضی کا سبب ان کی کارکردگی سے زیادہ ان کے وہ بیانات تھے جن میں انہوں نے ٹیم سلیکشن سمیت متعدد معاملات پر کھل کر رائے کا اظہار کیا تھا۔

متعدد سابق کرکٹرز بھی اس دوران شاہد آفریدی کی جگہ مصباح الحق کو کپتان بنانے کی خواہش کے ساتھ سامنے آئے لیکن عام رائے یہی تھی کہ ورلڈ کپ جیسے اہم ترین ایونٹ سے قبل قیادت کی تبدیلی ٹیم کے لئے نقصان دہ ثابت ہوگی اور شاہد آفریدی ہی ایک ایسے کھلاڑی ہیں جو ٹیم کو متحد رکھ سکتے ہیں۔

کپتان کے اعلان میں تاخیر کرکے خود بے یقینی کی فضا پیدا کرنے والے پاکستان کرکٹ بورڈ نے شاہد آفریدی پر اعتماد اسوقت ظاہر کیا جب ان کی قیادت میں ٹیم نے نیوزی لینڈ کے خلاف ون ڈے سیریز جیت لی۔

پاکستان کرکٹ بورڈ کے چیئرمین اعجازبٹ خود کئی روز نیوزی لینڈ میں رہے اس دوران وہ قیادت کے مسئلے پر اپنے ساتھیوں سے مشورے بھی کرتے رہے اور تمام معاملات طے کرنے کے بعد وہ جمعرات کی شب وطن واپس آئے جس کے فوراً بعد کپتان کی تقرری کا باضابطہ اعلان کردیا گیا۔

شاہد آفریدی تین ورلڈ کپ مقابلوں میں پاکستان کی نمائندگی کرچکے ہیں ۔

نیوزی لینڈ کے خلاف آخری ون ڈے سے پہلے تک وہ 20 ون ڈے انٹرنیشنل میچوں میں کپتانی کرچکے ہیں جن میں سے9 جیتے اور10 میں اسے شکست کا سامنا کرنا پڑا ہے۔