فیس بُک اور سکائپ کے مابین نیا معاہدہ

فیس بُک کے معاون بانی مارک سوکر برگ نے اعلان کیا ہے کہ ان کی سماجی نیٹ ورکنگ ویب سائٹ، سکائپ کے ساتھ پارٹنر شپ کرتے ہوئے ویڈیو کالنگ کا سلسلہ شروع کرے گی۔


مارک سوکر برگ نے یہ اعلان کرتے ہوئے کہا،’ ہم سمجھتے ہیں کہ یہ انتہائی عمدہ ابتداء ہو گی کیونکہ ہم ویڈیو کالنگ یا ’چیٹنگ‘ کے لیے دستیاب بہترین ٹیکنالوجی استعمال کر رہے ہیں‘۔ اس معاہدے کی شروعات میں فیس بُک ون ٹو ون ویڈیو چیٹ کا سلسلہ شروع کر رہا ہے تاہم بعد ازاں یہ گفتگو گروپ میں بھی ہو سکے گی۔ سوکر برگ کے بقول،’ ہم نے گروپ ویڈیو چیٹ کے امکان کو نظر انداز نہیں کیا ہے‘۔

فیس بُک کی طرف سے یہ نئی ٹیکنالوجی ایسے وقت میں متعارف کرنے کا منصوبہ بنایا گیا ہے جب حال ہی میں سرچ انجن گوگل نے بھی فیس بک کے مقابلے پر Google+ نامی ایک سروس شروع کی، جس میں ویڈیو گفتگو کا آپشن بھی موجود ہے۔ ناقدین کے بقول فیس بک اور سکائپ کے مابین یہ نئی پارٹنر شپ دراصل گوگل کا مقابلہ کرنے کے لیے متعارف کرائی گئی ہے۔
فیس بک کے شریک بانی سوکر برگ نے کہا کہ مائیکروسوفٹ نے سکائپ کو فیس بک میں شامل کرنے کا منصوبہ اسی وقت شروع کر دیا تھا، جب اُس نے سکائپ کو خریدا تھا۔ مائیکروسوفٹ نے سکائپ کو8.5 بلین ڈالر میں خریدا تھا۔ انہوں نے کہا کہ فیس بک کے استعمال کرنے والوں کی تعدد میں اضافہ ہو رہا ہے،’ اس وقت فیس بک کے صارفین کی تعداد 750 ملین ہے اور اس تعداد میں تیزی سے اضافہ ہو رہا ہے‘۔ سوکر برگ نے کہا کہ ان کے مائیکروسوفٹ کے ساتھ تعلقات بہت اچھے ہیں۔

دوسری طرف ویڈیو چیٹ کی بانی ویب سائٹ سکائپ کے چیف ایگزیکٹیو ٹونی بیٹس نے فیس بک کے ساتھ اپنے اس نئے اتحاد کو خوش آئند قرار دیا ہے،’ میرے خیال میں یہ ایک طویل المدتی تعلق ثابت ہوگا‘۔ ٹونی بیٹس نے مزید کہا کہ اس اشتراک سے دونوں کمپنیوں کو بھی فائدہ ہو گا اور ان سروسز کو استعمال کرنے والوں کو بھی۔

یہ امر اہم ہے کہ فیس بک اور سکائپ اس نئے منصوبے سے قبل بھی کئی طرح کے معاہدے کر چکے ہیں، جو کامیاب ثابت ہوئے ہیں۔