جیوتی دنیا کی پست قامت خاتون قرار

بھارت کی جیوتی امیگی نے دنیا کی سب سے پست قامت عورت ہونے کا اعزاز حاصل کر لیا۔ ریاست مہارا شٹر کے شہر ناگپور سے تعلق رکھنے والی جیوتی امیگی اٹھارہ برس کی ہوگئی ہے اور اس کا قد دو فٹ سے بھی کم ہے۔ گینز بک آف ورلڈ ریکارڑ حکام کے مطابق جیوتی کا قد ناپا گیا جو صرف 62.8 سینٹی میٹر ہے جس کے بعد اس کا نام گینز بک آف ورلڈ ریکارڈ میں شامل کر لیا گیا ہے۔ جیوتی کے والدین کا کہنا تھا کہ اسکا قد پیدائش کے چار ماہ کے بعد سے ہی بڑھنا بند ہوگیا تھا جس کے بعد ڈاکٹروں کو چیک کرانے پر پتہ چلا کہ اسے ایچونڈروپلاسیا نامی بیماری ہے۔ یاد رہے کہ اس سے پہلے یہ اعزاز امریکا سے تعلق رکھنے والی بائیس سالہ بریجیٹل جارڈن کے پاس تھا جس کا قد 69 سینٹی میٹر تھا جبکہ جیوتی اس سے سات سینٹی میٹر چھوٹی ہے۔ حکام کے مطابق اٹھارہ سالہ جیوتی کے قد میں گزشتہ دو سالوں کے دوران ایک سینٹی میٹر سے بھی کم کا اضافہ ہوا۔ جیوتی نے گنیز بک آف ورلڈ ریکارڑ کی جانب سے پست قامت عورت کا اعزاز ملنے پر خوشی کا اظہار کیا ہے۔