نازی دور کے تلخ حقائق امریکی ناول کا موضوع

امریکی مصنف ولیم ٹی وولمین اپنے ناول ’یورپ سینٹرل‘ میں ان جرمن اور روسی باشندوں کی زندگیوں کا جائزہ لیتے ہیں، جنہوں نے اسٹالن اور نازی ادوار میں یا تو حالات سے سمجھوتہ کیا یا پھر ان کا مقابلہ کرنے کی کوششیں کیں۔
ولیم ٹی وولمین (William T. Vollmann) نے قریب ایک ہزار صفحات پر مبنی اپنے اس ناول میں تاریخی حقائق کو نثری داستان گوئی کے لیے استعمال کیا ہے۔ وہ اس ناول میں روسی موسیقار دیمیتری شوستاکوووچ (Dmitri Shostakovich)، جرمن مصور Kaethe Kollwitz اور جرمن فیلڈ مارشل فریڈرش پاؤلُس کی زندگیوں کا جائزہ لیتے ہیں، جنہوں نے اسٹالن گراڈ میں ریڈ آرمی کے سامنے ہتھیار ڈال دیے تھے۔
جرمن خبر رساں ادارے ڈی پی اے سے بات چیت کرتے ہوئے وولمین نے بتایا کہ بچپن میں انہیں ان کے اسکول میں ایک دستاویزی فلم دکھائی گئی تھی، جو ایک حراستی کیمپ سے آزادی کے موضوع پر تھی۔ اگرچہ یہ دستاویزی فلم محض چار پانچ منٹ طویل تھی تاہم اس میں دکھائے جانے والے مناظر نے ان کی شخصیت پر گہرے اثرات مرتب کیے۔ ولیم وولمین کا خاندانی نام جرمن ہے اور وہ اس سوچ میں پڑ گئے کہ آیا ان کے رشتہ داروں نے بھی 1933ء سے 1945ء کے نازی دور میں وقت گزارا ہوگا۔ وولمین کے بقول پھر وہ اس سوچ میں پڑ گئے تھے کہ اگر وہ خود اس دور میں ہوتے، تو کیا کرتے اور حالات سے کس طرح نمٹتے۔
جب ان سے یہ پوچھا گیا کہ لوگ ان کے اس ناول کو ایک افسانے کی طرح پڑھیں یا پھر تاریخ سمجھتے ہوئے، تو وولمین کا کہنا تھا کہ وہ لوگوں کو بتانا نہیں چاہتے کہ انہیں یہ کتاب کس طرح پڑھنی چاہیے۔ ان کے بقول انہیں اس بات پر کوئی اعتراض نہیں کہ لوگ ’یورپ سینٹرل‘ کو محض ایک ناول کے طور پر پڑھیں تاہم وہ بذات خود اس کتاب کو لکھنا اپنی اخلاقی ذمہ داری سمجھتے تھے۔ وولمین کے مطابق انہوں نے یہ ناول یہ سوچ کر لکھا کہ ان لوگوں پر، جنہوں نے اس طرح کے ظلم و ستم کے دور میں وقت گزارا، کیا گزری ہو گی؟
اپنی تحریروں میں کئی مختلف موضوعات پر توجہ مرکوز کرنے کے حوالے سے پوچھے گئے ایک سوال کے جواب میں اس 54 سالہ امریکی مصنف کا کہنا تھا، ’’میں صرف اپنے بارے میں جانتے جانتے تھک جاؤں گا۔ میں اسے اپنی ذمہ داری سمجھتا ہوں کہ میں ایسے لوگوں کے بارے میں جانوں اور معلومات حاصل کروں، جنہوں نے مجھ سے زیادہ تکالیف اٹھائی ہیں۔‘‘