ورزش تھکاوٹ اور پریشانی سے چھٹکارا

برطانوی ماہرین نے روزانہ ورزش کو ذہنی پریشانی اور تھکاوٹ میں کمی کے لئے موثر قرار دیدیا ہے۔ گلاسگو یونیورسٹی کے محققین نے اپنی رپورٹ میں بتایا ہے کہ روزانہ کی ورزش سے دماغ کو سکون ملتا ہے جو انسانی رویے کو بہتر بنانے میں کارآمد ہوتا ہے۔ رپورٹ میں بتایا گیا ہے کہ معمول کا کام جسم کو وہ فوائد فراہم نہیں کر سکتا جو کہ روزمرہ کی ورزش سے حاصل ہوتے ہیں۔ رپورٹ کی تیاری کے دوران ماہرین نے روزانہ ورزش کرنے اور نہ کرنے والوں کے ذہنی تنائو کی کیفیت کی جانچ پڑتال کے لئے ان افراد کے ڈپریشن سکیل سے ٹیسٹ کروائے جن سے یہ بات واضح طور پر سامنے آئی کہ وہ لوگ جو روزانہ کی ورزش کو اپنی زندگی کا حصہ بنا لیتے ہیں۔ ورزش نہ کرنے والے افراد کی نسبت ذہنی پریشانی میں کم مبتلا ہوتے ہیں اور اپنے روزمرہ کے کاموں کو دوسروں کی نسبت بہتر طریقے سے انجام دے سکتے ہیں۔