ادھوری باتیں

ادھوری باتیں

ادھوری باتیں ہی زندگی ہیں
وہ گزری باتیں ہی زندگی ہیں
اگرچہ دل کی اجڑی ہوئی رتوں میں
بکھر گئی ہیں
کئی زمانوں سے ساری باتیں
وہ گزری باتیں
سلگتی شمعوں کے جلتے بجھتے آلاؤ ہی میں
پگھل گئی ہیں
ادھوری باتیں . . .
ضروری باتیں . . .
یہ خشک ہوتی ہوئی رگوں کی سیاہ قبروں میں نیم مردہ
داسی ہوئی خواہشوں کے ہمراہ
گندھی ہوئی ہیں
یہ آنکھ کی پتلیوں میں تھک کے
کھٹکتی پلکوں پر سو گئیں ہیں
تمام باتیں درست ہیں
تمام خدشے بجا ہیں لیکن
ہر اک امکان زندگی میں
رگوں میں اور روح کی زمین میں
انہی کی یادیں بھٹک رہی ہیں
انہی کے دم سے ضعیف جزبوں ، ٹھٹھرتے لفظوں
بجھی تمناؤں میں رمق ہے
ادھوری باتیں ہی زندگی ہیں
وہ گزری باتیں ہی زندگی ہیں
خیال رکھنا . . . . !
ادھوری باتیں بھلا نا دینا
وہ گزری باتیں بھلا نا دینا
ضروری باتیں . . . .
وہ گزری باتیں بھلا نا دینا
خیال رکھنا . . . . .
خیال رکھنا . . . !