چہرے نئے ہیں شہر پرانے تراش لوں

کمیاب ہے وفا تو بہانے تراش لوں
چہرے نئے ہیں شہر پرانے تراش لوں

نسبت میری جبیں کو انہیں پتھروں سے ہے
مشکل نہ تھا کہ آئینہ خانے تراش لوں

اوڑھے رہوں میں جلتی ہوئی دھوپ کی ردا
اور موسموں کے گیت سہانے تراش لوں

شبنم سے رہگزارِ سحر کا پتا کروں
مٹی سے رنگ و بُو کے خزانے تراش لوں

نومید مجھ سے میرا خدا آج بھی نہ ہو
زخموں کے خال و خد سے زمانے تراش لوں

میں جو اسیر ہوں تو خود اپنی نگاہ کی ہوں
دل کی خوشی کو لاکھ فسانے تراش لوں

شام و سحر سے دور زمانہ ملے، تو میں
اِس بے قرار جاں کے ٹھکانے تراش لوں

اِک خواب اور فصلِ بہاراں کے نام ادا
آ کر کہا ہے موجِ ہوا نے تراش لوں