روس پر امریکی پابندیوں سے اسلام آباد ماسکو تعلقات متاثر

جیو نیوز - کراچی....رفیق مانگٹ.....روسی وزارت خارجہ کے حکام کا کہنا ہےکہ روس پر امریکا کی معاشی پابندیاں پاک روس تعاون کو متاثر کر رہی ہیں۔کراچی سے لاہور تک ایل این جی پائپ لائن منصوبہ روس پاک معاشی تعاون کی تاریخ میں سب سے بڑا مشترکہ منصوبہ ہے جس کی مالیت دو ارب ڈالر ہے۔

صدر ولادی میر پیوٹن کے خصوصی ایلچی برائے افغانستان ضمیر کابلوو نے خبر رساں ادارئے ’ریا نووسٹی‘ سے بات کرتے ہوئے کہا کہ امریکی پابندیاں ماسکو اور اسلام آباد کے درمیان تعلقات کو متاثر کر رہی ہیں۔ ان کا کہنا تھا کہ روس پر عائد امریکا کی معاشی پابندیاں کراچی سے لاہور تک ایل این جی پائپ لائن منصوبے میں روس پاک تعاون پر منفی طور پر اثر انداز ہو رہی ہیں۔

ان کا مزیدکہنا تھا کہ روس کا پاکستان کے لیے یہ ایک بڑا منصوبہ ہے جس کی مالیت2ارب ڈالر ہے،جس میں روسی کمپنی ’گلوبل ریسورسز‘ شامل ہے لیکن جب اس کمپنی نے پاکستان کے ساتھ سمجھوتے پر دستخط کیے تو اس کے فوراً بعد مذکورہ کمپنی پر امریکا نے پابندیاں عائد کر دیں جس سے کمپنی کی سرگرمیوں میں رکاوٹ پیدا ہوئی۔ یہ غیرمنصفانہ بات ہے۔

اس منصوبے کے بارے روسی کارپوریشن’روس تیک‘ کے سربراہ سرگئی چیمیزوو کا کہنا تھا کہ کراچی سے لاہور تک ایل این جی پائپ لائن کی تعمیر دو تین ماہ میں شروع کی جائے گی۔کچھ عرصہ پہلے پاکستان کے وزیر پیٹرولیم شاہد حقان عباسی نے کہا تھا کہ پائپ لائن کی تعمیر ماہ جولائی میں شروع ہوگی۔