پارلیمنٹ ہاؤس میں نیا سیکورٹی پلان جاری

انٹیلی سیکورٹی اداروں کی طرف سے پارلیمنٹ ہاؤس میں تخریب کاری کی اطلاعات کے پیش نظر نیا سیکورٹی پلان جاری کرتے ہوئے ڈاک ، پارسل اور پیکٹ وصول کرنے کیلئے نیا طریقہ کار وضع کردیا ہے ۔



قومی اسمبلی سیکرٹریٹ کے ذرائع کے مطابق پارلیمنٹ ہاؤس اسلام آباد کی سیکورٹی یقینی بنانے کیلئے نئے سیکورٹی پلان کی منظوری دی گئی ہے جس کے تحت پارلیمنٹ ہاؤس میں آنے والی تمام ڈاک ، پارسل اور پیکٹ وصول کرنے سے قبل ان کی مکمل جانچ پڑتال ہوگی اور ایکسرے مشین کے ذریعے انہیں چیک کرنے کے بعد کلیئر کیا جائے گا جبکہ ان پارسلز کو لانے والے فرد کے نام ، شناختی کارڈ نمبر اور دفتری کارڈ کے نمبر کو بھی لازمی قرار دیدیا گیا ہے ۔



سیکورٹی پلان کے مطابق پارلیمنٹ ہاؤس میں آنے والے مہمانوں کو بریف کیس لانے سمیت سگریٹ نوشی پر بھی پابندی عائد کردی گئی ہے جبکہ پارلیمنٹ ہاؤس میں دفاتروں پر بھی سگریٹ نوشی کی ممانعت ہوگی ۔



پلان کے تحت پارلیمنٹ ہاؤس میں بجلی سے چلنے والے میٹر پر سختی سے پابندی عائد کرنے سمیت پارلیمنٹ ہاؤس کے اسٹاف کو دفتری کارڈ مناسب جگہ پر آویزاں کرنے کو بھی لازمی قرار دیاگیا ہے جبکہ تمام برقی آلات کو دفتر بند کرنے سے قبل دوبارہ بند کرنے سمیت تمام دفاترز کی ایک ایک چاپی پارلیمنٹ ہاؤس میں سی ڈی اے کے دفتر کو فراہم کرنے کی ہدایت کی گئی ہے ۔