برازیل: عالمی فٹ بال کپ کے دوران ڈینگی پھیلنے کا خطرہ

ساوٴ پولو… ماہرین نے خدشہ ظاہر کیا ہے کہ عالمی فٹ بال کپ کے دوران برازیل میں ڈینگی پھیلنے کا خطرہ ہے۔سائنس جرنل دی لینسٹ انفیکشیئس ڈیزیزز میں شائع ہونے والی رپورٹ میں کہا گیا ہے کہ عالمی فٹبال کپ کے دوران برازیل کے تین شہروں ناتال، فورتالزہ اور ریسیفی میں ڈینگی کے پھیلنے کا خدشہ زیادہ ہے۔بارہ جون سے شروع ہونے والے فیفا عالمی کپ کے لیے تقریباً دس لاکھ افراد برازیل کے بارہ شہر پہنچیں گے۔ خطرے سے نمٹنے کے لئے سائنسدانوں نے ایک نظام تیار کیا ہے جس کے ذریعے ورلڈ کپ کے دوران ڈینگی کے بارے میں حکام کو پیشگی اطلاع دی جا سکے گی۔سائنسدانوں کاکہنا ہے کہ برازیل کے شہر وں برازیلیا، کویابا، کوریتیبا، پورتو الیگرے اور ساوٴ پولو میں ڈینگی پھیلنے کا خطرہ کم ہے۔رپورٹ میں کہا گیا ہے کہ جن شہروں میں ڈینگی کا زیادہ خطرہ ہے وہاں پر خدشہ ہے کہ میچ دیکھنے والے لوگ جب واپس جائیں گے تو اس وقت ان کو ڈینگی ہو گیا ہو گا۔برازیل میں سنہ 2000 سے لے کر 2013 تک ستّر لاکھ ڈینگی کیسز سامنے آئے جو دنیا میں سب سے زیادہ ہیں۔