فرانسیسی خاتون اوّل کارلا بروٴنی کی فلم’ مڈ نائٹ ان پیرس‘ کا ٹریلر ریلیز

جنگ نیوز -
لاس اینجلس…ہالی وڈ فلم ساز اور ہد ایت کا رووڈی ایلن کی نئی فلم Midnight in Parisمیں میوزیم کی ناظمہ کا کردار حاصل کرکے ہالی ووڈ ڈیبیو کرنے والی فرانسیسی خاتونِ اوّل کارلا برونی کی اس فلم کا ٹریلر ریلیز کردیا گیا ہے۔ ووڈی ایلن کی فلمMidnight in Paris میں مرکزی کردار سے محروم ہونے کے بعدپیرس کے میوزیم کی منتظم کا چھوٹا سا کردار نبھانے والی خاتونِ اوّل کارلا برونی کو فلم میں صرف چند منٹ کا ایک کردار دیا گیا ہے۔فرانسیسی صدر نکولس سرکوزی کی42سالہ ماڈل اہلیہ کارلا برونی بیشک ماڈلنگ کی شعبے میں کامیاب رہی ہوں لیکن اداکاری کے میدان میں قدم رکھنے کے بعد ان کی اداکارانہ صلاحیتوں کی قلعی کھل گئی اور دنیا کے بہترین کامک ہدایتکار کی حیثیت سے خود کو دوبارہ منوانے کی جستجو میں مصروف ہدایتکار ووڈی ایلن نے فلم کو کامیابی سے ہمکنار کرنے کے لیے اس میں کارلا کا کردار بیحد مختصر کردیا۔واضح رہے کہ ہدایتکار ووڈی ایلن کی اس فلم میں اوون ولسن اور Rachel McAdamsمرکزی کردار ادا کررہے ہیں اور 11مئی کو کینز فلم فیسٹیول کا افتتاح اسی فلم سے کیا جائیگا۔