بھارتی کرکٹ بورڈ کی سیلاب زدگان کی امداد کیلئے میچ کھیلنے پر آمادگی

جنگ نیوز -


کراچی… پاکستان کرکٹ بورڈ کے چئیرمین اعجاز بٹ کا کہنا ہے کہ بھارتی کرکٹ بورڈ کے صدر سری نواسن سے ملاقات خوش گوار رہی ۔ بھارتی بورڈ کے صدر نے سیلاب زدگان کی امداد کے لئے پاک بھارت میچ پر آمادگی ظاہر کی ہے۔ اعجاز بٹ نے دبئی میں آئی سی سی اجلاس میں شرکت کے بعد واپسی پر، جیونیوز سے خصوصی گفتگو کرتے ہوئے کہا کہ بی سی سی آئی کے صدر سری نیواسن سے ملاقات خاصی حوصلہ افزا رہی ہے جہاں بھارتی بورڈ کے صدر نے پاکستان میں سیلاب زدگان کی مدد کے لئے امدادی میچ کھیلنے پر آمادگی ظاہر کی ہے ، وہیں پاک بھارت سیریز کے حوالے سے بھی بات چیت ہوئی۔ انٹرنیشنل کرکٹ کونسل کے اگلے صدر کے بارے میں اعجاز بٹ نے بتایا کہ یہ عہدہ پاکستان یا بنگلہ دیش میں سے کسی ایک کے پاس آسکتا ہے ،جبکہ چیف ایگزیکٹیو میٹنگ میں آئی سی سی کی صدارت کا سسٹم جاری رکھنے پر تمام بورڈ متفق ہیں۔