اسلام آباد اور راولپنڈی سمیت ملک کے مختلف علاقوں میں بارش

آج نیوز - اسلام آباد اور راولپنڈی سمیت ملک کے مختلف علاقوں میں وقفے وقفے سے بارش کا سلسلہ جاری ہے۔ محکمہ موسمیات نے آئندہ چوبیس گھنٹے کے دوران مزید بارش کی پیش گوئی کر دی۔ محکمہ موسمیات کے مطابق گذشتہ چوبیس گھنٹے کے دوران جڑواں شہروں سمیت پنجاب ، خیبر پختونخواہ اور کشمیر میں بارش ہوئی۔ اسلام آباد میں ننانوے ، راولپنڈی ستر ، بالاکوٹ اسی، لاہور پچاس، جہلم انچاس، گوجرانوالہ تیس، مری بتیس اور کوٹلی میں اکیس ملی میٹر بارش ریکارڈ کی گئی۔ بارش کے باوجود میدانی علاقوں میں حبس کی شدت بڑھ گئی ہے۔ محکمہ موسمیات کا کہنا ہے کہ آئندہ چوبیس گھنٹے کے دوران لاہور، گوجرانوالہ، فیصل آباد، سرگودھا، ساہیوال، شیخوپورہ، پشاور، کوہاٹ، نوشہرہ، بنوں، مالاکنڈ، ہزارہ ڈویژن اور کشمیر میں کہیں کہیں جبکہ جنوب مشرقی سندھ اور شمال مشرقی بلوچستان میں چند ایک مقامات پر تیز ہواوٴں کے ساتھ موسلا دھار بارش کا امکان ہے۔ محکمہ موسمیات کے مطابق مون سون بارشوں کا موجودہ سلسلہ مزید دو سے تین روز تک جاری رہ سکتا ہے۔