ٹیسٹ سیریز: قومی جونئیر ہاکی ٹیم کا اعلان 28 جولائی کو کیا جائیگا

آج نیوز - مصر کے خلاف پانچ ٹیسٹ میچز کی سیریز کیلئے قومی جونئیر ہاکی ٹیم کا اعلان اٹھائیس جولائی کو کیا جائے گا۔چیف کوچ کا کہنا ہے کہ کیمپ میں خامیوں پر قابو پایا جائے گا۔ یورپ سے واپسی پر جونئیر ٹیم کے مینجر کم چیف کوچ رانا مجاہد علی نے نیشنل ہاکی اسٹیڈیم میں جاری کیمپ جوائن کرکے کھلاڑیوں کو بھرپور ٹریننگ کرائی۔مینجر کا کہنا تھا کہ وہ انڈر ایٹین ایشیا کپ میں سامنے آنے والی خامیوں کو مدنظر رکھ کر ٹریننگ کرارہے ہیں تاکہ مصر کے خلاف ٹیم عمدہ کارکردگی دکھاسکے۔انہوں نے بتایا کہ قومی سلیکشن کمیٹی کھلاڑیوں کے ٹرائلز کے بعد اٹھارہ رکنی قومی ٹیم کا انتخاب کرے گی۔ رانا مجاہد نے جونئیر کھلاڑیوں کو زیادہ میچز کا تجربہ دلوانے کے فیڈریشن کے اقدام کو سراہا اور کہا کہ اس سے ان پلئیرز کے کھیل میں نکھار آئے گا۔