کراچی :تشدد ،ہلاکتیں سترہ ہوگئیں

آج نیوز - کراچی کے مختلف علاقوں میں فائرنگ سترہ افراد ہلاک ہوگئے۔ ملیر اور لانڈھی میں دن بھر فائرنگ کے بعد علاقے میں شدید خوف و ہراس پایا جاتا ہے ۔نارتھ کراچی میں انڈہ موڑ کے قریب نامعلوم موٹرسائیکل سواروں نے دکان پر فائرنگ کرکے تین افراد قتل کردیے۔ ملیر کا علاقہ دن بھر وقفے وقفے سے فائرنگ سے گونجتا رہا۔ نامعلوم افراد نے ملیر کے مختلف علاقوں میں پانچ راکٹ فائر کیے۔ ملیر میں فائرنگ سے زخمی ہونے والا شخص بدر اسپتال میں دم توڑ گیا۔ ملیر مرغی خانہ کے قریب فائرنگ سے عرفان نامی نوجوان ہلاک ہوگیا۔
دوسری جانب لیاقت آباد میں فائرنگ سے ایک شخص جاں بحق ہوا۔ لیاری کے علاقے گھاس منڈی میں فائرنگ سے ایک شخص ہلاک اور ایک زخمی ہوگیا۔ سرجانی میں نامعلوم افراد نے فائرنگ کرکے ایک شخص کو قتل کردیا۔ مواچھ گوٹھ میں بھی نامعلوم افراد کی فائرنگ سے تیس سالہ ذیشان ہلاک ہوا۔ شادمان ٹاوٴن نمبر دو میں موٹر سائیکل سواروں نے ارم اپارٹمنٹ کے قریب چائے کے ہوٹل پر بیٹھے افراد پر فائرنگ کردی۔ جس سے تین افراد ہلاک ہوگئے۔ مقتول سیاسی تنظیم کے کارکن تھے۔ بھٹائی آباد میں بھی سکندر علی چانڈیو نامی شخص کو قتل کردیا گیا۔ کھارادر میں فائرنگ سے بچہ ہلاک اور ایک شخص زخمی ہوا۔