پنجاب: مختلف شہروں میں موسلادھار بارش، موسم خوشگوار

آج نیوز - لاہور سمیت پنجاب کے مختلف شہروں میں موسلادھار بارش سے حبس زدہ موسم خوشگوار ہوگیا۔ لوڈشیڈنگ اور گرمی سے ستائے روزہ داروں نے سکھ کا سانس لیا ہے۔ منڈی بہاؤالدین میں چھت گرنے سے باپ جاں بحق اور بیٹا زخمی ہوگیا۔ لاہور سمیت پنجاب کے دوسرے شہروں میں سحری کے وقت کالے بادل چھا گئے اور ٹھنڈی ہوائیں چلتی رہیں جس کے بعد بارش شروع ہو گئی۔ بارش سے حبس اور گرمی کا زور ٹوٹ گیا۔ گوجرانوالہ، سیالکوٹ، کامونکی، گجرات، مریدکے، حافظ آباد اور گردونواح میں موسلادھار بارش ہوئی۔ منڈی بہاؤالدین میں مکان کی چھت گرنے سے باپ جاں بحق جبکہ بیٹا زخمی ہوگیا۔ بارش سے لوڈشیڈنگ ، گرمی اور حبس سے مرجھائے ہوئے چہرے کھل اٹھے۔ موسم کی وجہ سے روزہ داروں کے لئے بھی آج کا دن خوشگوار ہوگیا ہے۔ بارش کا مزہ لینے کے لئے لوگوں کی بڑی تعداد گھروں سے باہر نکل آئی اور پارکوں اور باغوں میں چہل قدمی کرکے موسم سے لطف اندوز ہوتی رہی۔