کراچی :بہادرآباد ،بھتہ نہ دینے پر ایک شخص قتل ،دو زخمی

آج نیوز - کراچی کے علاقے بہادر آباد میں بھتہ نہ دینے پر ایک شخص کو ہلاک اور دو کو زخمی کردیا گیا۔ شہر کے دیگر علاقوں میں فائرنگ اور پرتشدد واقعات میں مزید چار افراد موت کی نیند سلا دیئے گئے۔ بہادرآباد کے علاقے میں دھوراجی میں چکن شاپ کے مالک ارشد سے بھتے کا مطالبہ کیا گیا تھا جسے اس نے نظر انداز کردیا۔ جس پر دو ملزمان نے چکن شاپ کے مالک ارشد پر اندھا دھند فائرنگ کردی۔جس کے نتیجے میں دکان کا مالک ارشد دو ملازم سمیت زخمی ہوا جنہیں فوری اسپتال منتقل کیا گیا جہاں دکان کا ملازم عامر زخمیوں کی تاب نہ لاتے ہوئے دم توڑ گیا۔واقعے بعد مشتعل افراد علاقے کی سڑکوں پر نکل آئے اور تھانے پر پتھراو کیا جس سے ایک پولیس موبائل کو نقصان پہنچا۔ گارڈن فقیری مسجد العزیز ہائیٹس کے قریب عمیر نامی نوجوان نامعلوم افراد کی فائرنگ کا نشانہ بنا۔ شومارکیٹ میں بھی ایک نوجوان سہیل کو قتل کردیا گیا محمود آباد نمبر چھ میں راوٴ نصیر نامی شخص موت کی نیند سلا دیا گیا۔ قصبہ موڑ، کریم آباد، کورنگی صنعتی ایریا اور سبزی منڈی میں فائرنگ سے چار افراد زخمی ہوئے۔