تھائی فضائیہ کے سربراہ کی جنرل خالدشمیم اورایئرچیف سے ملاقات

اے آر وائی - پاکستان کے دورے پر آئے ہوئے رائل تھائی ائیر فورس کے کمانڈر ان چیف ائیر چیف مارشل اتھا پورن سبھاوونگ کی چیئرمین جوائنٹ چیفس آف اسٹاف جنرل خالد شمیم وائین اور ایئر چیف مارشل راؤ قمر سلیمان سے ملاقات۔



چیئرمین جوائنٹ چیفس آف سٹاف کمیٹی جنرل خالد شمیم وائیں سے پاکستان کے دورے پر آئے ہوئے رائل تھائی ائیر فورس کے کمانڈر ان چیف ائیر چیف مارشل اتھا پورن سبھاوونگ نے ملاقات کی ، جوائنٹ سٹاف ہیڈ کوارٹرز چکلالہ میں ہونے والی اس ملاقات میں باہمی دفاعی تعلقات اور پیشہ وارانہ دلچسپی کے امور پر تبادلہ خیال کیا گیا ، رائل تھائی ائیر فورس کے کمانڈر ان چیف ائیر چیف مارشل اتھا پورن سبھاوونگ نے اس موقع پر دہشت گردی کے خلاف جنگ میں پاکستان کی قربانیوں اور کردار کو سراہا۔



اس سے قبل انہوں نے ائیر ہیڈ کوارٹرز کا دورہ کیا جہاں ان کی آمد پر پاک فضائیہ کے سربراہ ائیر چیف مارشل راؤ قمر سلیمان نے اپنی تھائی ہم منصب کا استقبال کیا ، اس موقع پر انہیں پاک فضائیہ کے ایک چاک و چوبند دستے نے گارڈ آف آنر پیش کیا ، گارڈ آف آنر کے معائنے کے بعد رائل تھائی ائیر فورس کے کمانڈر ان چیف ائیر چیف مارشل اتھا پورن سبھاوونگ کا پرنسپل سٹاف افسران سے تعارف کرایا گیا ، بعدازاں تھائی فضائیہ کے سربراہ نے ائیر ہیڈ کوارٹرز میں قائم یادگار شہداء پر پھولوں کی چادر چڑھائی ، اس موقع پر دونوں فضائیہ کے سربراہان کے درمیان ہونے والی ملاقات میں باہمی اور پیشہ وارانہ دلچسپی کے امور پر تبادلہ خیال کیا گیا ، تھائی فضائیہ کے سربراہ کو پاک فضائیہ سے متعلق بریفنگ بھی دی گئی ۔