حج کرپشن کیس،تفتیشی افسر کی بحالی کا نوٹی فکیشن لانے کیلئے ایک اور مہلت

جنگ نیوز -


اسلام آباد…سپریم کورٹ نے حج کرپشن کیس کی تفتیش پر ایف آئی اے آفیسر حسین اصغر کی بحالی نہ ہونے کی صورت میں سیکریٹری اسٹیبلشمنٹ سے کہا ہے کہ وہ ساڑھے گیارہ بجے تک حسین اصغر کی بحالی کا نوٹی فکیشن لائیں بصور ت دیگر جیل جانے کیلئے تیار رہیں۔ چیف جسٹس کی سربراہی میں سپریم کورٹ کے چھ رکنی بنچ نے حج کرپشن کیس کی سماعت کی، ڈی جی ایف آئی اے آج پھر عدالت میں حاضر نہ ہوئے ۔ سیکریٹری اسٹیبلشمنٹ نے بتایاکہ حسین اصغر کی بحالی کے لئے نوٹی فکیشن کی سمری مجازاتھارٹی یعنی وزیراعظم کو بھیجی گئی تاہم اس پر جواب نہیں آیا، چیف جسٹس نے کہاکہ یہ نوٹی فکیشن آج ہی لایاجائے۔ عدالت نے اس کیلئے ساڑھے گیارہ بجے تک کی مہلت دی،چیف جسٹس نے ریمارکس میں کہا کہ عدالتی حکم میں چیف ایگزیکٹو یعنی وزیراعظم رکاوٹ بنتے ہیں تو ان سے بھی قانونی دائرہ میں نمٹاجاسکتا ہے ، عدالت نے تحریری حکم میں کہا کہ نوٹی فکیشن نہ آیا تو سیکریٹری کو جیل جانا پڑے گا۔