بالائی علاقوں اور سندھ میں بارشیں، متعدد نشیبی علاقے زیر آب آگئے

جنگ نیوز -


اسلام آباد…پشاور ، سوات ، راولپنڈی اور اسلام آباد میں رات کو بارش کا سلسلہ جاری رہا۔جس سے موسم خوشگوار ہوگیا وفاقی دارالحکومت اسلام آباد اور راولپنڈی میں بارشوں کی وجہ سے سڑکیں پانی سے بھر گئیں۔راولپنڈی اسلام آباد میں سحر کے وقت شروع ہونے والی بارش تقریبا 2 گھنٹے جاری رہی،جس سے ندی نالوں میں طغیانی پیداہوگئی اور پانی سڑکوں اور گلیوں میں داخل ہو گیا اور کئی نشیبی علاقے زیر آب آگئے۔بارشوں کی وجہ سے موسم ٹھنڈا ہو گیا ہے۔محکمہ موسمیات نے آئندہ دنوں میں بھی بارشوں کا سلسلہ جاری رہنے کی پیش گوئی کی ہے۔پشاور اور گرد و نواح میں تیز ہواوٴں کے ساتھ بارش سے موسم خوشگوار ہوگیا ضلع سوات میں بھی بارش سے موسم خوشگوار ہو گیاہے۔ ادھر سندھ کے ضلع بدین میں وقفے وقفے سے ہلکی بارش کا سلسلہ جاری ہے۔گزشتہ دوروز کی طوفانی بارشوں کے باعث شادی لارج،پنگریو،ملکانی اور ملحقہ علاقوں میں کئی دیہات زیر آب آگئے۔متاثرہ دیہاتوں کی جانب جانے والے کچے راستے بھی پانی جمع ہونے کے باعث بند ہیں۔ضلعی انتظامیہ کی جانب سے ضلع بھر میں ایمرجنسی نافذ کرکے 30 ریلیف کیمپس قائم کئے گئے ہیں۔تاہم یہاں پہنچنے والے متاثرین کا کہنا ہے کہ انہیں کل شام سے کسی حکومتی اہلکار نے نہیں پوچھا نہ ان کے لئے ہی افطار و سحری کا کوئی انتظام کیاگیا۔ میر پور خاص میں رات گئے موسلادھار بارش ہوئی جس کے باعث مکان کی چھت گرنے سے چھ افراد جاں بحق اور چار زخمی ہوگئے۔ ضلع ٹنڈو الہ یار کے شہروں چمبڑ،جھنڈو مری،ٹنڈو الہ یار سمیت ضلع کے اکثر شہروں میں چار چار فٹ پانی جمع ہے جس کے نکاس کے لئے کوئی انتظام نہیں کیا گیا۔کئی علاقوں میں گھروں میں پانی داخل ہونے سے شہریوں کو شدید مشکلات کا سامنا ہے۔ حیدرآباد کے علاقوں سبزی منڈی،ریلوے کالونی،لطیف آباد نمبر دو اور چھ سمیت مختلف علاقوں میں بھی ایک ایک فٹ پانی جمع ہے۔ ٹھٹھہ میں بھی مختلف علاقوں میں بارشوں کے باعث کئی دیہات زیر آب آگئے۔