ٹیکس کے غلط اعداد و شمارپراستعفیٰ دینا چاہتا تھا،چیئرمین ایف بی آر

جنگ نیوز -


اسلام آباد...چیئرمین ایف بی آر سلمان صدیق نے کہا ہے کہ وہ گزشتہ مالی سال میں ٹیکس وصولی کے غلط اعداد و شمار پر مستعفی ہونے کی پیش کش کرچکے ہیں۔انہوں نے کہا کہ گزشتہ اڑھائی برس میں افغانستان کے تقریبا 24 ہزار کنٹینرز لاپتا ہوئے جس سے ڈیوٹی کی مد میں 50 ارب روپے کا نقصان ہوا۔چیئرمین ایف بی آر نے اسلام آباد میں قومی اسمبلی کی قائمہ کمیٹی خزانہ امور کو بتایا کہ گزشتہ مالی سال میں انکم ٹیکس پر 15 فیصد فلڈ سرچارج سے ریونیو وصولی کا ہدف 36ارب روپے تھا لیکن وصول صرف 8 ارب روپے ہوئے۔پچھلے اڑھائی برس میں افغانستان جانے والے 23 ہزار 952 کنٹینرز لاپتا ہوئے تھے، سلمان صدیق نے کہا کہ وہ ٹیکس کے غلط اعدادوشمار پر مستعفی ہونے کی پیش کش کرچکے ہیں حکومت نے ابھی تک اس پیش کش کو منظور نہیں کیا۔