افغان فورسز کوجولائی2011سے ذمہ داریاں سونپنا شروع کردینگے،بائیڈن

جنگ نیوز -
انڈیاناپولس. . . . .. . . .امریکی نائب صدر جو بائیڈن نے کہا ہے کہ جولائی د وہزار گیارہ سے افغان سیکیورٹی فورسز کو سیکورٹی کی ذمہ داریاں سونپنا شروع کردیں گے۔ تاہم افغان فوج اور پولیس کی تربیت کے انچارج امریکی جرنیل کا کہنا ہے کہ وہ اگلے سال اکتوبر سے پہلے اتحادی افواج سے ذمہ داریاں لینے کے قابل نہیں ہوسکیں گی۔انڈیاناپولس میں سابق فوجیوں سے خطاب کرتے ہوئے بائیڈن کا کہنا تھا کہ جولائی دو ہزار گیارہ میں فوج کا انخلا شروع کرنے کی ڈیڈلائن کا مطلب امریکا کی افغانستان سے رخصتی نہیں۔ یہ صرف افغان فورسز کو سیکیورٹی ذمہ داریاں بتدریج منتقل کرنے کا آغاز ہے۔ بائیڈن نے کہا کہ ماضی میں افغانستان میں جنگ کو نظرانداز کیا گیا۔ واشنگٹن نے وہاں اب جاکر واضح حکمت اختیار کی ہے اور فوج کی تعداد بڑھائی ہے۔ اس لیے یہ کہنا کہ امریکا افغانستان میں ناکام ہوگیا ہے قبل از وقت ہوگا۔ کیونکہ ابھی تو ہم نے مقصد حاصل کرنے کیلئے صحیح جرنیل اور فوج کی درست تعداد کے ساتھ شروعات کی ہیں۔ اُدھر امریکی کمانڈر لیفٹیننٹ جنرل بِل کیلڈ وَیل کا کہنا ہے کہ ناخواندگی اور بھگوڑے ہونے کی اونچی شرح کے سبب افغان فورسز کی تربیت میں مسائل پیش آرہے ہیں۔ اور وہ نیٹو فوج سے اپنے ملک کی سیکیورٹی کی ذمہ داریاں لینے کے قابل اگلے سال اکتوبر کے آخر تک ہی ہوسکیں گے۔