ڈیلس: حضورﷺ کی شان میں نعتیہ مشاعرہ کا اہتمام

جیو نیوز - ڈیلس…راجہ زاہد اختر خانزادہ/ نمائندہ جنگ… کمیونٹی کی معروف سیاسی‘ سماجی و ادبی شخصیت مائیک غوث کی جانب سے حضورﷺ کی شان میں نعتیہ مشاعرہ کا اہتمام کیا گیا جس میں مسلم‘ احمدی‘ بوہری‘ اسماعیلی‘ شیعہ‘ سنی اور WD محمد کمیونٹی کے رہنماؤں اور پیروکاروں نے بڑی تعداد میں شرکت کی۔ محفل نعت میں تمام کمیونٹی کے افراد نے حضورﷺ کی شان میں نعتیہ کلام پیش کیا جبکہ کئی افراد نے نعت خوانی پیش کی۔ ڈیلس کی تاریخ میں پہلی بار ایسا موقع فراہم کیا گیا تھا کہ تمام کمیونٹیز ایک ساتھ حضورﷺ کے میلاد کے سلسلہ میں جمع تھیں۔ اس موقع پر ہندو اور سکھ کمیونٹی کے افراد بھی موجود تھے۔ مائیک غوث نے اس موقع پر خطاب کرتے ہوئے تمام کمیونٹیز کا شکریہ ادا کیا جنہوں نے بھرپور طریقے سے اس میلاد میں شرکت کی جبکہ شہر کے شعراء بھی اس تقریب میں شریک ہوئے۔ آنے والے افراد کا کہنا تھا کہ مائیک غوث نے یہ تقریب منعقد کر کے ان کی روح کو ایک بار پھر سے بیدار اور زندہ کر دیا ہے ان کو یہ تقریب اور میلاد کی محفل عرصہ دراز تک یاد رہے گی۔