چین جیسی بڑی طاقتوں سے جنگ کے قابل نہیں،امریکی انکشاف

جیو نیوز - واشنگٹن ........... امریکہ فوج کے چیف آف اسٹاف مارک اے ملی نے اعتراف کیا ہے کہ امریکی فوج چین جیسی بڑی طاقتوں سے جنگ کرنے کے قابل نہیں ہے۔

میڈیارپورٹ کے مطابق امریکی کانگریس کی مسلح افواج کمیٹی کے اجلاس میںبریفنگ دیتے ہوئےجنرل مارک ملی نے روس، چین، ایران اور شمالی کوریا جیسی طاقتوں سے جنگ کے لئے امریکہ کی صلاحیت کے بارے میں کہاکہ امریکی فوج بڑی طاقتوں سے جنگ کرنے کی اہلیت نہیں رکھتے۔

انہوں نے کہاکہ مالی ذرائع اور مکمل فوجی تربیت کا فقدان امریکہ کی فوجی آمادگی میں بڑی رکاوٹ کا باعث ہے۔ فوجی آمادگی و توانائی کے لحاظ سے اس وقت امریکہ بڑی طاقتوں سے مقابلہ کرنے کی پوزیشن میں نہیں ہے۔ ادھرامریکی فضائیہ کے کمانڈر ڈیبورا جیمز نے بھی کہا ہے کہ امریکی فوجیوں کی نصف تعداد میں جنگی آمادگی نہیں پائی جاتی۔

انھوں نے کہا کہ فوجی آمادگی میں بجٹ بہت اہمیت رکھتا ہے تاہم فوجی آمادگی کے لئے فوجیوں کو تربیت دیئے جانے کی بھی بہت زیادہ ضرورت ہوتی ہے۔ اس سے قبل امریکی فضائیہ کے حکام نے کہا تھا کہ امریکی فضائیہ کو لڑاکا طیاروں کے استعمال کے اعتبار سے پانچ سو کی تعداد میں پائلٹوں کی کمی کا سامنا ہے۔

واضح رہے کہ گیارہ ستمبر دو ہزار ایک کے حملوں کے بعد سے امریکہ کے فوجی اخراجات میں بہت زیادہ اضافہ ہوا ہے اور ایسی حالت میں امریکی فوج کا بجٹ، دنیا کے کسی بھی ملک کا سب سے بڑا فوجی بجٹ شمار ہوتا ہے۔