حاجی اشرف انٹراسکول ٹوئٹی 20 کرکٹ ٹورنامنٹ کل سے شروع ہوگا

جنگ نیوز -
کراچی… کہکشاں اور المعارج اسکول کے زیراہتمام آل کراچی حاجی اشرف انٹراسکول ٹوئٹی 20 کرکٹ ٹورنامنٹ پیر سے راشد لطیف اکیڈمی گلبرگ میں شروع ہورہا ہے۔ ٹورنامنٹ کا آغاز قومی کرکٹ ٹیم کے سابق کپتان راشد لطیف کریں گے جبکہ اعزازی مہمانوں میں کے سی سی اے کے صدرسراج الاسلام بخاری، کیپٹن ہاشم غازی، کے پی ٹی کے اسپورٹس آفیسر شاہ نعیم ظفر، نصراللہ خان، عالمگیر احمد زبیر بابا شامل ہیں۔ ٹورنامنٹ کے سیکرٹری امیر اکرم کے مطابق ٹورنامنٹ کا آغاز رنگا رنگ تقریب سے کیا جائے گا جس میں مختلف اسکولوں کے بچے شرکت کریں گے۔دریں اثناء سہیل شہزاد شام کے اناس المرزوکی کو شکست دیکر ورلڈ اسنوکر چیمپئن شپ کے لاسٹ 32 راؤنڈ میں پہنچ گئے۔ شام کے دارالحکومت دمشق میں جاری چیمپئن شپ کے لاسٹ 64 راؤنڈ میں سہیل شہزاد نے شاندار کارکردگی کا مظاہرہ کرتے ہوئے شامی کھلاڑی اناس المرزوکی کو باسانی 4-1 سے شکست دینے میں کامیاب رہے۔ پری کوارٹر فائنل میں پیر کو سہیل شہزاد کا مقابلہ تھائی لینڈ کے نوپاڈول سیگنل سے ہوگا۔ دیگر پاکستانی کھلاڑیوں میں محمد سجاد کا مقابلہ تھائی لینڈ کے ڈیچاوٹ پونجینگ اور عمران شہزاد کا آسٹریلیا کے اینڈیاز پلونر سے ہوگا۔