بین الاقوامی کرکٹ میں بدعنوانی عام ہے ،آفتاب گل

جنگ نیوز -
لاہور ... اسپاٹ فکسنگ الزامات میں معطل پاکستانی کرکٹر سلمان بٹ کے وکیل آفتاب گل کا کہنا ہے کہ بین الاقوامی کرکٹ میں بدعنوانی عام ہے اور اُن کے پاس رونگٹے کھڑے کردینے والے شواہد ہیں۔ آفتاب گل نے برطانوی ٹی وی سے بات کرتے ہوئے کہا کہ بین الاقوامی کرکٹ میں بدعنوانی بھری پڑی ہے، اسپاٹ فکسنگ کے ذریعے یہ کام اور بھی آسان ہوگیا ہے۔ انہوں نے دعویٰ کیا کہ ان کے پاس بہت سے شواہد ہیں اور اگر انہوں نے بدعنوانی میں ملوث افراد کے نام لینے شروع کیے تو سننے والوں کے رونگٹے کھڑے ہوجائیں گے۔ جب سلمان بٹ سے پوچھا گیا کہ کیا بدعنوانی پاکستان کا ایک مسئلہ ہے تو ان کا کہنا تھا کہ بدعنوانی دنیا بھر میں موجود ہے، کوئی ایک کھیل، ایک محکمہ بتا دیں جہاں لوگ ایک دوسرے کو دھوکہ دینے کی کوشش نہیں کررہے، اور ایک فرد کی حیثیت سے یہی کیا جاسکتا ہے کہ اس سے بچنے کی کوشش کی جائے۔