باکسنگ: عامر خان اور زیب جیڈا متفقہ ٹائٹل کیلئے مدمقابل

اے آر وائی - لاس اینجلس : پاکستانی نژاد برطانوی باکسر عامر خان متفقہ لائٹ ویلٹر ویٹ بیلٹ کے لئے آئی بی ایف چیمپئن زیب جیڈا سے جولائی میں مقابلہ کریں گے۔ ورلڈ باکسنگ ایسوسی ایشن کے عالمی لائٹ ویلٹر ویٹ چیمپئن عامر خان اپنی ویٹ کیٹیگری میں کئی نامور باکسرز کو زیر کرچکے ہیں۔ جن میں انتونیو بریرا،ایندریس کوٹلنک اور مارکوس میڈنا شامل ہیں۔



گذشتہ ماہ عامر خان نے پال مک کلوسکی کیخلاف چوتھی بار عالمی اعزاز کا کامیاب دفاع کیا۔ زیب جیڈا انٹرنیشنل باکسنگ فیڈریشن کے لائٹ ویلٹر ویٹ چیمپئن ہیں۔ ویلٹر ویٹ ڈویژن میں ترقی سے قبل عامر خان لائٹ ویلٹر ویٹ کے متفقہ ٹائٹل کیلئے زیب جیڈا سے مقابلہ کریں گے۔ دونوں تنظیموں کے چیمپئنز کی فائٹ تئیس جولائی کو لاس اینجلس میں ہوگی۔ عامر خان نے کہاکہ جیڈا بہت عمدہ فائٹر ہے لیکن انہیں اپنی جیت کا یقین ہے۔