آسٹریلوی اوپنر سائمن کیٹچ سینٹرل کنٹریکٹ سے محرومی پر برہم

اے آر وائی - سڈنی : آسٹریلوی اوپنر سائمن کیٹچ نے سینٹرل کنٹریکٹ میں شامل نہ کئے جانے پر سخت غم وغصہ کا اظہار کیاہے۔ سائمن کیٹچ نے چھپن ٹیسٹ میچز میں پینتالیس کی عمدہ اوسط سے چار ہزار ایک سو اٹھاسی رنز بنائے ہیں جس میں دس سنچریز اور پچیس ففٹیز شامل ہیں لیکن انہیں آئندہ سال کیلئے آسٹریلیا کے پچیس کرکٹرز میں شامل نہیں کیاگیا۔



سائمن کیٹچ نے پریس کانفرنس میں کہا کہ وہ پہلے بھی ایسی صورتحال کا سامناکرچکے ہیں۔بعض افراد سلیکٹرز پر اثرانداز ہونے اورٹیم میں تبدیلی کا اختیار رکھتے ہیں۔ وہ اور شین واٹسن آسٹریلیا کو مسلسل عمدہ آغاز فراہم کررہے ہیں ان کے ساتھ سلوک سے ٹیم کو بھی سخت نقصان ہوگا۔سائمن کیٹچ نے نئے کپتان مائیکل کلارک کیخلاف گفتگو سے گریز کیا۔ کرکٹ آسٹریلیا کے چیف ایگزیکٹو جیمز سدر لینڈ نے کہاکہ وہ کیٹچ کی مایوسی کو سمجھ سکتے ہیں اس لئے کرکٹر کے خلاف کوئی کارروائی نہیں ہوگی۔