ریمنڈ ڈیوس کے معاملے پر امریکا نے کوئی دھمکی نہیں دی، حسین حقانی

جنگ نیوز -
کراچی… امریکا میں پاکستانی سفیر حسین حقانی نے تردید کردی ہے کہ انہیں کسی امریکی اہلکار نے کوئی دھمکی دی نہ ہی کسی نے انہیں انتہائی اقدامات کرنے کے بارے میں بتایا۔ امریکی سفارت خانے نے بھی کہاہے کہ امریکی ذرائع ابلاغ میں ریمنڈ ڈیوس کے معاملے پر پاکستان کو دھمکی دینے کی اطلاعات کی تردید کرتے ہیں۔ ترجمان دفترخارجہ کے مطابق امریکی میڈیا کی خبرگمراہ کن ہے۔حسین حقانی نے یہ بات ایک سماجی ویب سائٹ پر تحریر کیے گئے پیغام میں بتائی ہے جس میں انہوں نے کہا ہے کہ امریکا کی نیشنل سیکیورٹی ایجنسی کے اہلکاروں سمیت انہیں کسی نہ تو ذاتی نوعیت کی دھمکی دی ہے اور نہ انتہائی اقدامات کے بارے میں کچھ بتایا گیا ہے۔،امریکی سفارتخانے کے ترجمان کا کہنا ہے کہ امریکی ذرائع ابلاغ میں چھپنے والی خبر بے بنیاد ہے، پاکستان کودھمکی دینے کی اطلاعات کی تردیدکرتے ہیں۔دفترخارجہ کے ترجمان عبدالباسط نے کہاہے کہ امریکی میڈیا میں شائع ہونے والی خبر اور اس بارے میں اطلاعات گمراہ کن ہیں۔امریکا میں پاکستان کے سفارت خانے کے ترجمان نے کہا ہے کہ حسین حقانی نہ تو پاکستان جارہے ہیں اور نہ ہی انہیں پاکستان جانے کے لیے کہا گیا ہے۔ترجمان کے مطابق پاکستان کے سفیر واشنگٹن میں ہیں۔اس سے پہلے ایک امریکی اخبار میں شائع ہونے والی خبر میں سفارتی ذرائع سے بتایا گیا تھا کہ امریکا نے پاکستان پر واضح کردیا ہے کہ امریکا میں پاکستانی سفارت خانہ بند کیا جاسکتا ہے، پاکستانی سفیر حسین حقانی کو امریکا سے نکالا جا سکتا ہے اور پاکستانی صدرآصف زرداری کا دورہ امریکا بھی منسوخ کیا جاسکتا ہے۔اس سلسلے میں امریکا میں پاکستانی سفیر حسین حقانی کی وائٹ ہاوس میں طلبی بھی کی گئی ہے ۔میڈیا کے ذرائع کے مطابق امریکاسمجھتاہے لاہور پولیس پرحکومت پاکستان کا کنٹرول نہیں۔