متحدہ کے مطالبے پر ہٹایا گیا تو پارٹی کی خاطر قربانی دوں گا، ذوالفقار مرزا

جنگ نیوز -
کراچی…خورشید عباسی…سندھ کے وزیرداخلہ ڈاکٹر ذوالفقار مرزا نے کہا ہے کہ اگرمتحدہ قومی موومنٹ کے مطالبے پر مجھے عہدے سے ہٹایا گیا تو پارٹی کی خاطر قربانی دینے کیلئے تیار ہوں تاہم پارٹی کے اندر میری کارکن کی حیثیت کوئی ختم نہیں کرسکتا۔ صحافیوں سے گفتگو کرتے ہوئے انہوں نے کہا کہ شہید ذوالفقار علی بھٹو اور شہید محترمہ بینظیر بھٹو کے دیے گئے پیغام کے مطابق جہاد کرتا رہوں گا اور ان کے دکھائے ہوئے راستے پر چلوں گا۔ انہوں نے کہا کہ لیاری پیپلز پارٹی کا گڑھ ہے ،وہاں کے لوگ ہمارے لوگ ہیں، ان کی مدد جاری رکھیں گے۔ اس سے قبل آج صبح جب وہ سندھ اسمبلی کے اجلاس میں شرکت کیلئے پہنچے تو پیپلز پارٹی کے ارکان نے ان کا کھڑے ہوکر استقبال کیا اور انہیں ”شیر کراچی“ کا خطاب دیا، اس موقع پر اسمبلی کے اندر پی پی ارکان نے اور باہر کارکنوں نے ان کے حق میں نعرے لگائے ۔