اعصام الحق اور عقیل خان کو شاہدہ فاروق کی مبارکباد

جنگ نیوز -
کراچی …ڈیوس کپ ٹینس میں پاکستانی کھلاڑیوں کی عمدہ کارکردگی پر صبح نو کی چیئرپرسن اور خواتین ٹینس کی روح رواں شاہدہ کوثر فاروق نے اعصام الحق، عقیل خان کی شاندار پرفارمنس پر انہیں اور پاکستان ٹینس فیڈریشن کے سربراہ کلیم امام کو مبارک باد پیش کی ہے۔ جنگ سے باتیں کرتے ہوئے شاہدہ فاروق نے بتایا کہ پاکستان ٹینس نے ثابت کیا ہے کہ ملک میں ذہین کھلاڑیوں کی کمی نہیں ہے اگر نچلی سطح پر صحیح کوشش کی جائے تو ہمیں بہت سے اعصام الحق اور عقیل خان مل سکتے ہیں۔ اعصام الحق نے عالمی سطح پر پاکستان کا نام روشن کیا ہے۔ ڈیوس کپ میں اعصام نے پہلے سنگل میں شکست کے باوجود اگلے میچوں میں جس کارکردگی کا مظاہرہ کیا ہے وہ قابل تعریف ہے۔ پاکستان نے ایشیا اوشیانا زون گروپ ٹو میں ہانگ کانگ کو 3-2 سے شکست دیکر اگلے مرحلے میں کھیلنے کا اعزاز حاصل کیا ہے۔ دوسرے راؤنڈ میں پاکستان کا مقابلہ ساؤتھکوریا سے ہوگا جس کے مقابلے 8 سے 10 جولائی تک ہوں گے۔ ہانگ کانگ میں کھیلے جانے والے ایونٹ کے سنگلز میں اعصام الحق کو پہلے میچ میں ہیو ٹنگ کے خلاف شکست ہوئی جبکہ عقیل خان نے مارٹن سیر کو شکست دیکر سنگلز میں مقابلہ 1-1 سے برابر کیا۔