29 مئی 2011
وقت اشاعت: 5:59
قندھار کی جیل پر شدت پسندوں کا حملہ،سینکڑوں قیدی فرار
جنگ نیوز -
کابل…افغان حکام کا کہنا ہے کہ قندھار جیل پر شدت پسندوں نے حملہ کرکے سینکڑوں قیدیوں کو فرار کرادیا، فرار ہونے والے قیدیوں میں بڑی تعداد طالبان جنگ جوؤں کی ہے۔افغان حکام کے مطابق آج علی الصباح طالبان جنگ جوؤں کے ایک گروپ نے قندھار شہر میں واقع مرکزی جیل پر حملہ کردیا۔ اس دوران شدت پسندوں اور جیل پر تعینات سیکیورٹی اہلکاروں کے درمیان شدید جھڑپیں ہوئی جس میں کئی سیکیورٹی اہلکار ہلاک ہوگئے۔ جھڑپوں کے دوران طالبان جنگ جوؤں نے جیل کے اندر گھس کر دھماکے کیئے جس سے جیل کے مرکزی دروازے ٹوٹ گئے۔ عسکریت پسندوں کی اس کارروائی میں جیل کے تمام قیدی فرار ہوگئے۔ حکام کے مطابق فرار ہونے والے قیدیوں کی تعداد 500 سے زائد ہے جن میں جنگ جو اور اہم طالبان رہنما قیدی بھی شامل ہیں۔ واقعے کے بعد قندھار جیل کے اطراف میں واقع علاقوں میں کرفیو نافذ کردیا گیا ہے۔ جبکہ علاقے کا کنٹرول نیٹو فورسز اور افغان نیشنل آرمی نے سنبھال لیا ہے۔
