ایبٹ آبادآپریشن والا علاقہ سیل، کمپاؤنڈ تعمیر کرنے والا ٹھیکیدار گرفتار

جنگ نیوز -
ایبٹ آباد…ایبٹ آباد میں اسامہ بن لادن کے مکان کی تعمیر کرنیوالے ٹھیکیدار گل مداح کو سکیورٹی اہل کاروں نے حراست میں لے لیا ہے جبکہ بلال ٹاؤن میں اسامہ کے کمپاؤنڈ تک جانے والے راستہ کو ایک بار پھر سے بند کردیا گیا ہے۔ذرائع کے مطابق ایبٹ آباد میں اسامہ بن لادن کے مکان کو تعمیر کرنیوالے ٹھیکیدار کو خفیہ ایجنسیز نے اپنے حراست میں لے لیا ہے۔ گرفتار ہونے والے ٹھیکیدار کا نام گل مداح ہے اور اس کا تعلق الائی بٹ گرام سے ہے ۔گل مداح کو گذشتہ رات خفیہ ایجنسیز نے حراست میں لے کر نامعلوم مقام پر منتقل کردیا ہے۔گل مداح کی عمر45 سے50 سال کے درمیان بتائی جاتی ہے ۔ گل مداح ایبٹ آباد میں نڑیاں کے مقام پر رہائش پذیر تھا۔ دوسری جانب ایبٹ آباد کے علاقے بلال ٹاؤن میں واقع اسامہ بن لادن کے کمپاؤنڈ کو جانیوالے راستے کو آج صبح پھر سے بند کردیا گیا ہے۔ یہ راستہ گذشتہ روز ملکی اور غیر ملکی میڈیا کیلئے کھولا گیا تھا۔آج پولیس اور سکیورٹی اہلکاروں نے کمپاؤنڈ کے باہر کیمپ لگادیا ہے اور اب وہاں تک جانے کی اجازت کسی کو نہیں دی جارہی ہے۔آج تیسرے روز بھی ایبٹ آباد میں سیکورٹی نہایت سخت ہے اور مختلف شاہراؤں پر سکیورٹی فورسز اور پولیس کا گشت جاری ہے ۔ذرائع کے مطابق اہلیہ اور یمنی معالجہ کو ایبٹ آباد سے منتقل کردیاگیاہے۔دوسری جانب ذرائع کے مطابق گذشتہ روز جیونیوز کی جانب سے یہ خبر بھی بریک کی گئی تھی کہ آپریشن کے بعد بھی ایبٹ آباد کے مقامی اسپتال میں زخمی ہونیوالے اہم افرادزیرعلاج ہیں، آج ملنے والی اطلاعات کے مطابق اسامہ کی اہلیہ اور ان کی ذاتی یمنی معالجہ کو بھی یہاں سے منتقل کردیاگیاہے،تاہم بیٹے کے بارے میں اب تک کوئی مصدقہ اطلاعات موصول نہیں ہوپائی ہیں ۔محکمہ مال کے اہلکاروں نے گذشتہ روز اس کمپاؤنڈ کی پیمائش بھی کی اور اس بارے میں مختلف پہلوؤں سے تفتیش کی جارہی ہے کہ یہ مکان کس نے خریدا اور کس نے کرائے پر حاصل کیا۔