ویسٹ انڈیز کیخلاف قومی ٹیم شاندار کارکردگی دکھا رہی ہے،نسیم اشرف

جنگ نیوز -
پشاور…پاکستان کرکٹ بورڈ کے سابق چیئرمین ڈاکٹر نسیم اشرف نے کہا ہے کہ ویسٹ انڈیز کے خلاف قومی ٹیم شاندار کارکردگی کا مظاہرہ کر رہی ہے جس پر کپتان شاہد آفریدی مبارک باد کے مستحق ہیں۔پشاور میں کھیلوں کے ادارے ملک سعد میموریل اسپورٹس ٹرسٹ کے دورے کے موقع پر میڈیا سے گفت گو میں نسیم اشرف نے کہا کہ قومی ٹیم ورلڈ کپ میں بھی اچھا کھیلی،آئندہ اگر نوجوان کھلاڑیوں پر انحصار کیا جائے تو پاکستان2015 کا ورلڈ کپ جیت سکتا ہے۔ انھوں نے کہا کہ میچ فکسنگ اور اسپاٹ فکسنگ کو جڑ سے اکھاڑ پھینکنا ہو گا۔ ان کا یہ بھی کہنا تھا کہ میں جب تک چیئرمین تھا قومی کرکٹ ٹیم کے بارے میں کوئی شکایت نہیں ملی تھی ۔