فلپائن میں سمندری طوفان سے ہلاکتوں کی تعداد15ہوگئی

جنگ نیوز -
منیلا …جنگ نیوز…فلپائن میں سمندری طوفان ”نان مڈال“ کے باعث ہلاک ہونے والوں کی تعداد بڑھ کر15ہوگئی جبکہ حکام نے سینکڑوں افراد لاپتہ ہونے کی وجہ سے ان ہلاکتوں کی تعداد میں اضافے کا خدشہ ظاہر کیا ہے۔ شہری دفاع کے ادارے کے سربراہ نے صحافیوں سے گفتگو کرتے ہوئے بتایا کہ یہ ہلاکتیں جزیرہ لوزان میں سمندری طوفان کی وجہ سے سیلاب آنے اور مٹی کے تودے گرنے کی وجہ سے ہوئیں۔ انہوں نے کہا کہ سینکڑوں افراد لاپتہ ہیں جن کی تلاش کا کام جاری ہے۔ انہوں نے امکان ظاہرکیا کہ یہ افراد یا تو سمندر میں بہہ گئے ہیں یا پھرمٹی اور پہاڑی تودوں میں دبے ہوئے ہیں جبکہ سمندری طوفان کے پیش نظرمتاثرہ علاقے سے 61ہزار افراد کو محفوظ مقامات پرمنتقل کیا گیا تھا۔ جزیرہ لوزان کے بیشتر علاقوں میں بجلی کی فراہمی بدستور منقطع ہے جس کی بحالی کیلئے کام شروع کردیا گیا ہے۔