متحدہ اور پی پی ایک دوسرے کی ساکھ متاثر کرنے پر کاربند ہیں،وکی لیکس

جنگ نیوز -


کراچی…متحدہ قومی موومنٹ اور پیپلز پارٹی کے تعلقات میں اتار چڑھاوٴ آج کی بات نہیں۔ خفیہ امریکی مراسلے سے انکشاف ہوا ہے کہ ایڈمنسٹریٹرز کی تعیناتی پر اتفاق کے باوجود ایم کیو ایم اور پیپلز پارٹی ،، سندھ میں ایک دوسرے کی ساکھ متاثر کرنے پر کاربند ہیں۔ کراچی میں امریکی قونصل جنرل اسٹیفن جی فاکان نے نو فروری دو ہزار دس کو واشنگٹن مراسلہ بھیجا۔ مراسلے کے مطابق دونوں جماعتوں کے وزراء مسلسل امریکی سفارت کاروں سے رابطے میں رہتے ہیں اور علیحدہ علیحدہ ملاقاتوں میں دونوں طرف سے الزام تراشی کا سلسلہ بھی جاری رہتا ہے۔ کراچی میں ٹارگٹ کلنگ کے حوالے سے مراسلے میں تحریر اس طرح سے ہے ؛ ذوالفقار مرزا بمقابلہ مصطفی کمال ۔ ایک موقع ایسا بھی آیا جب اس وقت کے صوبائی وزیر داخلہ ذوالفقار مرزا نے ناظمین کو برقرار رکھنے کے معاملے پر ایم کیو ایم کے مطالبات تسلیم کرنے کیلئے تیار تھے۔ مراسلے کے مطابق کراچی میں یوم عاشور سمیت ٹارگٹ کلنگ اور دہشت گردی کے دیگر واقعات ہی وہ وجوہات رہیں جن کی وجہ سے سندھ میں مقامی حکومتوں کے مستقبل کے بارے میں بحث چھڑ گئی۔