کرینہ کپور21ستمبر کو اپنی31ویں سالگرہ منائیں گی

جنگ نیوز -


ممبئی …بالی ووڈ کی بیبو( کرینہ کپور)21ستمبر کو اپنی31ویں سالگرہ منائیں گی۔21ستمبر 1980کو ریاست مہارشٹرا کے شہر ممبئی میں بالی ووڈ کے نامور کپور خاندان میں جنم لینے والی کرینہ نے بالی ووڈ میں اپنا پہلا قدم 2000میں فلم "رفیوجی "کے ذریعے رکھا جس میں ناقدین نے انکی کارکردگی کو بیحد سراہا ۔2001میں فلم "مجھے کچھ کہنا ہے" سے باکس آفس پر بے پناہ کامیابی سمیٹنے والی کرینہ نے "اجنبی"،"اشوکا"،"کبھی خوشی کبھی غم"،"چمیلی"،"دیو"،"اومکارہ"،"جب وی میٹ"،"گول مال" اور" تھری ایڈیٹس" سمیت مختلف فلموں میں بہترین اداکاری کا مظاہرہ کرتے ہوئے کئی ایوارڈز اپنے نام کیے۔کرینہ کپور کی حال ہی میں ریلیز ہونے والی فلم" باڈی گارڈ" نے بھی باکس آفس پر کامیابی کے جھنڈے گاڑ دیے ہیں جس میں انکے ساتھ سلمان خان نے مرکزی کردار ادا کیا ہے جبکہ شاہ رخ خان کیساتھ انکی آنے والی فلم"RA One"کا بھی فلمی شائقین بے صبری سے انتظار کررہے ہیں۔کرینہ کے حوالے سے تازہ ترین اطلاعات یہ بھی سامنے آرہی ہیں کہ وہ اگلے سال اپنے بوائے فرینڈ اور بالی ووڈ کے صفِ اول کے اداکار سیف علی خان کے ساتھ شادی کے بندھن میں بھی منسلک ہوجائیں گی۔