حیدرآباد:ہالا ناکا کے قریب دھماکا، 13افراد زخمی،ہلاکتوں کا خدشہ

جنگ نیوز -
حیدر آباد…حیدر آباد کے قریب ہالا ناکا پر ایک زور دار دھماکا ہوا ہے۔ عینی شاہد نے جیو نیوز کو بتایا کہ دھماکا ایک کمرشل جگہ پر ہوا جس کے نتیجے میں8سے زائد دکانیں مکمل طور پر تباہ ہو گئیں جبکہ ایک مسجد کو بھی نقصان پہنچا۔دھماکے کی آواز کئی کلومیٹر دور تک سنی گئی۔آر پی او حیدر آباد فیاض لغاری نے جیو نیوز کو بتایا کہ دھماکے کے نتیجے میں زخمی ہونے والے8افراد سول اسپتال جبکہ5افراد دوسرے اسپتال منتقل کر دیئے گئے ہیں جن میں4کی حالت نازک ہے۔ فیاض لغاری کے مطابق دھماکے کی نوعیت تا حال معلوم کرنے کی کوشش کی جارہی ہے اور موقع پر موجود لوگوں کے مطابق دو ٹرک اس جگہ پر موجود تھے جن میں سے ایک میں دھماکا ہوا۔ انہوں نے کہا کہ یہ واضح نہیں کہ آیا دھماکا ٹرک پر موجود کیمیکل کے ڈرم میں ہوا یا کسی اور وجہ سے اور فی الحال اسے دہشت گردی کی واردات قرار نہیں دیا جاسکتا۔ ایدھی ذرائع کے مطابق5افراد شدید زخمی ہیں اور ہو سکتا ہے کہ جان کی بازی ہار دیں۔