حیدرآباد،ہالاناکا دھماکے میں18افراد جاں بحق،40زخمی

جنگ نیوز -
حیدرآباد . . . حیدرآباد میں کھڑے ٹرک میں ہونے والے دھماکے میں18افراد ہلاک جبکہ متعدد زخمی ہوئے ہیں۔ایس ایس پی اسپیشل برانچ محمد علی بلوچ کے مطابق ہالا ناکا پر کھڑے کیمکل ٹرک میں گیس کا دباؤ بڑھنے سے دھماکا ہوا ہے۔دھماکے کے نتیجے میں 18 افراد ہلاک جبکہ 40افراد زخمی ہوئے ہیں جن میں 9 کی حالت تشویش ناک ہے۔ دھماکے کے نتیجے میں آس پاس کے کچے مکانات متاثر ہوئے ہیں۔ ان کا کہنا تھا کہ ملبے میں مزید افراد دبے ہوسکتے ہیں جن کو نکالنے کے لیے ریسکیو ٹیمیں کوشش کر رہی ہیں۔دھماکے میں ہلاک اور زخمی ہونے والے افراد کو سول اور ایک نجی ہسپتال منتقل کیا گیا۔ زخمیوں کے مطابق دھماکا کافی زور دار تھا اور اس کے بعد انہیں کچھ پتا نہیں کہ کیا ہوا۔دھماکے کے بعد حیدرآباد کے تمام ہسپتالوں میں ایمرجینسی نافذ کردی گئی ہے۔عینی شاہدین کے مطابق وہ اپنے کام میں مصروف تھے کہ ایک زبردست دھماکا سنائی دیا جس کے بعد انہوں نے موقع پر پہنچ کر امدادی کارروائیوں میں حصہ لیا، جبکہ اہلیان علاقہ کا کہنا ہے کہ تھنر سے بھرا ٹرک اس علاقے میں کس طرح آیا اور یہ کہ اس سلسلے میں تحقیقات ہونی چاہیں۔