دورہ انگلینڈ،پاکستانی ٹیم کا آج دوسرا سائیڈ میچ کاؤنٹی کینٹ کے خلاف

جنگ نیوز -
لندن…انگلینڈ کے دورہ پر موجود پاکستان کرکٹ ٹیم آج دوسرا سائیڈ میچ انگلش کاؤنٹی کینٹ کے خلاف کھیلے گی۔ پاکستان ٹیم نے کل دورہ کا کامیاب آغاز کیا اور پہلے ٹوئنٹی ٹوئنٹی میچ میں میری لیبون کرکٹ کلب کو چھ رنز سے شکست دی ۔ لارڈز میں پاکستان نے ٹاس جیت کربیٹنگ کی۔ آفریدی الیون نے مقررہ بیس اوورز میں پانچ وکٹ پر 165 رنزبنائے۔ عمر اکمل نے ناقابل شکست 51 رنز کی اننگز کھیلی۔ شاہ زیب حسن نے 34اور سلمان بٹ نے 21 رنز بنائے۔ سابق کیوی آل راؤنڈر کرس ہیرس نے تین وکٹیں لیں۔ جواب میں اسٹارز سے سجی ایم سی سی کی ٹیم مقررہ اوورز میں پانچ وکٹ پر 159رنز بناسکی۔ ایڈن بلزرٹ نے 73اور سابق ویسٹ انڈین کپتان برائن لارا 37رنز بناکر نمایاں رہے۔ شعیب اختر اور عمر گل نے دو ، دوکھلاڑیوں کو آؤٹ کیا۔