5 ستمبر 2011
وقت اشاعت: 6:16
الطاف حسین اور صدر آصف زرداری کے درمیان ٹیلیفون پر بات چیت
اے آر وائی - متحدہ قومی موومنٹ کے قائد الطاف حسین اورصدر آصف علی زرداری کے درمیان ٹیلیفون پر تفصیلی گفتگو ہوئی۔ گفتگو انتہائی خوشگوار ماحول میں ہوئی جو 45منٹ تک جاری رہی۔ صدرآصف علی زرداری نے جناب الطاف حسین کی خیریت دریافت کی اورصحتیابی پرانہیں مبارکباد پیش کی ۔
الطاف حسین نے دوران علالت خیریت دریافت کرنے، صحتیابی کیلئے نیک جذبات کااظہارکرنے اورمحبتوں کے ساتھ گلدستہ بھیجنے پر صدرآصف زرداری کاخصوصی شکریہ اداکیا ۔ دونوں رہنماوں کے درمیان ملک کی سیاسی صورتحال پر بھی تبادلہ خیال ہوا اوراس بات پر بھرپوراتفاق کیا گیا کہ ایم کیوایم اور پیپلزپارٹی کے درمیان تعلقات کومزیدمضبوط بنایاجائے گا اوردونوں جماعتیں ملک میں جمہوریت کے استحکام کیلئے آپس میں مل جل کرکام کریں گی اور کوئی بھی سازش دونوں جماعتوں کے تعلقات کوخراب نہیں کرسکتی ۔
صدرآصف علی زرداری نے ملک کے استحکام اورجمہوریت کی بقاء کیلئے بحیثیت جماعت ایم کیو ایم اور الطا ف حسین کے کردار کوسراہا اورالطا ف حسین سے کہاکہ ہمیں آپ سے بڑی امیدیں وابستہ ہیں اورپاکستان کے استحکام اور آنیوالی نسلوں کے بہتر مستقبل کیلئے ہمیں آپ کی رہنمائی اوردعاوں کی بہت ضرورت ہے۔
الطاف حسین نے صدرآصف زرداری کے خیالات کو سراہا اور کہا کہ وہ پاکستان کی بقاء وسلامتی، ترقی وخوشحالی اور جمہوریت کے استحکام کیلئے اپنا کرداراداکرتے رہیں گے ۔ انہوں نے صدرآصف زرداری کویقین دلاتے ہوئے کہاکہ میری تمام ہمدردیاں آپ کے ساتھ ہیں آپ کوجب بھی ملک کیلئے میری ضرورت ہو میں حاظرہوں۔
