ٹنڈو محمد خان :کچی شراب پینے سے ہلاکتیں 55ہوگئیں، مقدمہ درج

جیو نیوز - ٹنڈو محمد خان .........ٹنڈو محمد خان میں کچی شراب پینے سے ہلاک ہونے والوں کی تعداد55ہوگئی جن میں تین خواتین بھی شامل ہیں ،22افراد اب بھی حیدر آباد کے سول اسپتال میں زیر علاج ہیں ،واقعہ کا مقدمہ درج کرلیاگیا ہے ۔

ٹنڈومحمد خان کےعلاقے کریم آباد کالونی میں کچی شراب بیچنے والوں کے خلاف سٹی تھانے میں سرکار کی مدعیت میں مقدمہ درج کرلیاگیا ہے ۔ مقدمہ میں علی نواز پنہور،حاکم علی پنہور ،عبد الرحمان پنہور ،شوکت اور تین نامعلوم افراد کو نامزد کیاگیا ہے ۔اب تک کوئی گرفتاری عمل میں نہیں آئی ہے۔

ٹنڈو محمدخان کے مختلف اسپتالوں میں کچی شراب پینے سے ہلاک ہونے والوں کی تعداد 26 اور حیدرآباد کےسول اسپتال میں 29 ہوگئی ہے۔ سول اسپتال حیدر آباد میں اب بھی 22 افراد زیرعلاج ہیں ۔

ایس ایس پی نسیم آرا پنہور، ڈی ایس پی خالد رستمانی اور متعلقہ تھانے کے ایس ایچ او کو معطل کردیاگیا ہے۔ نامعلوم افراد نے کریم آباد کالونی میں مبینہ طور پر شراب بیچنے والے شخص کےگھر کو آگ بھی لگادی ۔

مرنے والے زیادہ تر افراد کا تعلق اقلیتی برادری سے ہے۔