29 جون 2011
وقت اشاعت: 6:7
مراقبہ کرنے سے امراض قلب کے خطرات کم ہوجاتے ہیں،تحقیق
جنگ نیوز -
واشنگٹن …مراقبے کو جہاں ذہنی سکون کے لیے بیحد مفید تصور کیا جاتا ہے وہیں اسکے طبی فوائد بھی بیشمار ہیں۔حال ہی میں سامنے آنے والی ایک تحقیق کے مطابق مراقبے کرنے سے ناصرف دل کے دورے بلکہ فالج کے حملے کے خطرات بھی 50تک فیصد کم ہوجاتے ہیں۔امریکی انسٹیٹیوٹ کے ماہرین کی اس تحقیق میں یہ واضح کیا گیا ہے کہ مراقبہ کرنے سے ناصرف ہائی بلڈ پریشر میں کمی واقع ہوتی ہے بلکہ کولیسٹرول کی سطح بڑھنے اور شریانیں بھی پھولنے سے محفوظ رہتی ہیں۔ماہرین کے مطابق تناؤ دل کے امراض کی ایک اہم وجہ ہے جبکہ مراقبے سے تناؤ پرباآسانی قابو پایا جاسکتا ہے۔میڈیکل کالج آف Wisconsinکے ماہرین نے اس تحقیقی مطالعے کے لیے 59سال کی اوسط عمر پر مشتمل200خواتین اور مرد وں کو زیرِ نگرانی رکھاجن میں سے نصف کو مراقبے اور نصف کو عام علاج معالجے،ڈائیٹ اور معمول کی ورزشیں کروائیں۔اس عملی تجربے سے حاصل ہونے والے نتائج کے مطابق مراقبہ کرنیوالے نصف رضاکاروں میں دوسروں کی نسبت دل کے دوروں اور فالج کے خطرات47فیصدتک کم پائے گئے۔