افواج کی زیر حراست شدت پسندوں کے ٹرائل کیلئے نیا قانون لایا جائیگا

جنگ نیوز -


اسلام آباد...مسلح افواج کی حراست میں قبائلی علاقوں میں موجود ہزاروں شدت پسندوں کے ٹرائل کیلئے نیاقانون لایاجائیگا۔ ریگولیشن کے مطابق جرم کی نوعیت کے مطابق پھانسی،عمرقید اور دس سال قید تک کی سزائیں بھی دی جاسکیں گی اوردہشت گردی میں ملوث افراد کیلئے خصوصی حراستی مراکز قائم کئے جاسکیں گے۔ جیونیوز کے نمائندے عاصم علی رانا کوذرائع نے بتایاہے کہ ایکشن ان ایڈ آف سول پاور ریگولیشن دوہزارگیارہ کے نام سے لایاجانے والاقانون سوات اور دیگر علاقوں میں موجود زیرحراست شدت پسندوں کے خلاف کارروائی کیلئے متعارف کرایاجارہاہے،جو یکم فروری2008 سے نافذالعمل ہوگا۔ اس کااطلاق خیبرپختونخواکے زیرانتظام قبائلی علاقوں میں ہوگا۔ قانون کے تحت مسلح افواج کسی علاقہ میں ذمہ داری ملنے پر عام شہریوں کو نکلنے کی ہدایت کریں گی اور دہشت گردی میں ملوث افراد کیلئے خصوصی حراستی مراکز قائم کئے جاسکیں گے۔انسانی حقوق کی خلاف ورزی کی شکایت پر تحقیقات کیلئے2 سویلین اور2فوجی افسروں پرمشتمل بورڈ کام کریگا۔ پاٹا کے علاقوں میں نفرت پھیلانے والالٹریچر بانٹنے والا بھی ملزم تصور ہوگا۔ ملزم کو صوبہ بھر میں کسی بھی تحقیقاتی ادارے کے حوالے کیا جاسکے گا،سب سے اہم معاملہ شہادت کا تھا جس کے تحت حراستی مرکز کی طرف سے تیار کی گئی تحقیقاتی رپورٹس اور موادکو عدالت میں تسلیم کیا جائے گا اورمسلح افواج کے افسران کی عدالت میں گواہی کو تسلیم کیا جائیگا اور الزام ثابت کرنے کیلئے یہ گواہی کافی ہوگی۔