کراچی:5منزلہ عمارت منہدم، بہن بھائی سمیت چار افراد جاں بحق

جنگ نیوز -


کراچی . . . . . . کراچی کے علاقے لیاری میں پانچ منزلہ رہائشی عمارت گرنے سے دو بہن بھائی سمیت چار افراد جاں بحق جبکہ 20 سے زائد افراد زخمی ہوگئے۔ متعدد افراد ابھی بھی ملبے تلے دبے ہوئے ہیں۔ لیاری کے علاقے بغدادی کی موسیٰ لین میں پانچ منزلہ رہائشی عمارت آج صبح منہدم خستہ حالی کے باعث زمین بوس ہوگئی۔ حادثے کی اطلاع ملتے ہی فائر بریگیڈ، ایدھی فاوٴنڈیشن، چھیپا ویلفیئر، خدمت خلق فاوٴنڈیشن، پولیس اور ضلعی انتظامیہ موقع پر پہنچ گئی۔ علاقے کے رہائشی افراد نے بھی اپنی مدد آپ کے تحت امدادی کام میں حصہ لیا۔ ملبہ اٹھانے کیلئے مشینری اور ماہرین بھی امدادی کام میں شریک ہوگئے۔ تاہم علاقے کی گلیاں تنگ ہونے کے باعث امدادی کارکنوں اور رضاکاروں کومشکلات کا سامنا کرنا پڑرہا ہے۔ اہل محلہ کے مطابق کے ابھی بھی ملبے میں کئی افراد دبے ہوئے ہیں جبکہ ان کے عزیز اقارب جائے حادثہ پہ اپنے پیاروں کی خیریت کیلئے دیوانہ وار گھومتے دکھائی دیئے۔ حادثے کی اطلاع ملتے ہی سول اسپتال میں ایمرجنسی نافذ کردی گئی تھی۔ ہلاک اور زخمی ہونے والے افراد کو سول اسپتال منتقل کیا جاتا رہا۔ اسپتال ذرائع کے مطابق جاں بحق ہونے والوں میں دس سالہ اریشہ، اس کا 20 سالہ بھائی بلال شامل ہیں جبکہ ان کے 4 بہن بھائیوں سمیت 15 افراد زخمی ہوئے، ملبے سے ایک خاتون کو 4 گھنٹے بعد زندہ جبکہ ایک خاتون کی لاش نکالی گئی۔ جائے حادثہ اور اسپتال میں شہریوں کی بڑی تعداد کے جمع ہوجانے سے امدادی کاموں میں شدید دشواری کا سامان رہا۔ کمشنر کراچی اور ڈپٹی کمشنر ساوٴتھ مصطفی جمال قاضی امدادی کاموں کی نگرانی کرتے رہے جبکہ حادثہ کے مقام کے قریب ایک اور خستہ حال عمارتوں کو بھی خالی کرالیا گیا۔ ڈی سی ساوٴتھ کے مطابق متاثرین کیلئے شاہ لطیف بھٹائی حال میں امدادی کیمپ لگایا گیا ہے۔ گورنر سندھ ڈاکٹر عشرت العباد خان نے اعلی حکام کو زخمیوں کے علاج اور دیکھ بھال کے لئے تمام ذرائع بروئے کار لانے کی ہدایت کردی ہے۔