لاہور : نوجوان کی ہوائی فائرنگ، 3 سالہ بچہ جاں بحق، ملزم فرار

جنگ نیوز -
لاہور … لاہور کے علاقے گوالمنڈی میں ایک شخص نے محض دہشت پھیلانے کیلئے فائرنگ کردی،اس کی گولیوں نے ایک ماں کا کلیجہ چھلنی کر دیا اور اس سے اس کا 3سال کا لال ہمیشہ کیلئے چھین لیا،ملزم واقعے کے بعد فرار ہوگیا۔ 3سالہ نعمان تارا دیوی اسڑیٹ گوالمنڈی کا رہائشی اور موٹر مکینک محمد نعیم کا بیٹا تھا، اس کی والدہ دکان سے سودا سلف لینے گئی تو وہ بھی ٹافیاں لینے کیلئے اپنے بڑے بھائی کے ساتھ پیچھے بھاگ گیا، ننھے فرشتے کو کیا معلوم تھا کہ محلے کے ایک بدمعاش کی محض دہشت پھیلانے کیلئے کی گئی فائرنگ اس کی زندگی کا چراغ گل کر دے گی، اہلِ محلہ کے مطابق ملزم زاہد پہلے بھی فائرنگ کرتا رہتا تھا، آج اس کی گولی نے ایک ماں سے اس کا جگر گوشہ چھین کر اس پر قیامت ڈھا دی ہے، پولیس نے ننھے نعمان کے والد کی مدعیت میں مقدمہ درج کرکے ملزم کی تلاش شروع کر دی ہے۔