پاک انگلینڈ ٹیسٹ سیریز آج سے شروع ہو گی

جنگ نیوز -
لندن . . . پاکستان اور انگلینڈ کی کرکٹ ٹیموں کے درمیان چار ٹیسٹ میچوں کی سیریز کا پہلا میچ آج سے ناٹنگھم میں شروع ہو رہا ہے ۔سابق اورموجودہ کرکٹرز آسٹریلیا کے خلاف ٹیسٹ میچ میں جیت کے باوجود انگلینڈ کے خلاف سیریز کو مشکل قرار دے رہے ہیں ۔پاکستان کرکٹ ٹیم نے 15 برس کے طویل عرصے کے بعد آسٹریلیا کے خلاف تاریخی کامیابی حاصل کی ۔ سابق ٹیسٹ کرکٹر عبدلقادر اس فتح کی وجہ سے قومی ٹیم کے حوصلوں کو بلند تو قرار دیا ہے مگر پیش گوئی کرنے سے گریز کیا۔سابق کرکٹرز ہارون رشید اور عظمت رانا کا خیال ہے کہ آسٹریلیا اور پاکستان دونوں کے لیئے انگلش کنڈیشنز اجنبی تھیں لیکن اب انگلینڈ کے لیئے ایسی صورت حال نہیں ہو گی ۔ انگلینڈ کی ٹیم آسٹریلیا سے اچھی ہی نہیں بلکہ ہوم گراونڈ کا بھی اسے فائدہ ہو گا ۔مصباح الحق اور سہیل تنویر بھی انگلینڈ کے ساتھ مقابلے کو آسان قرار نہیں دے رہے، مگر نوجوان ٹیم سے انہیں اچھی کارکردگی کی امید ہے۔کرکٹرز کی اس بارے میں کوئی دورائے نہیں ہیں کہ پاکستان کی بالنگ عمر گل ، محمد عامراور محمد آصف کی موجودگی میں مضبوط ہے وہ انگلینڈکیا کسی بھی بیٹنگ لائن اپ کو تہس نہس کرنے کی صلاحیت رکھتی ہے لیکن انہیں شک ہے تو پاکستان کی مڈل آرڈر بیٹنگ پر۔